Түм буман асуулт

Тэнгэрийн оддоос их

Толгой өвдмөөр асуултууд

   Өөрөө би хариулт

   Өмнө чинь зогсож байна

   Ганцхан надаас л битгий асуу

   Гараараа тархийг минь ч бүү цоол

Ертөнц оршихуйн гайхамшгийг мэдрэх бүрт

Би өөрийгөө мартсан байдаг

Ер бусын гэгээг амьдралаас олж харахдаа

Би өөрийгөө гээсэн байдаг

Тэгэхээр би хүн биш

Нар гарч байна

Илч  гэрэл нь халуухан бас дулаахан

Гэхдээ

Ганцаараа болхоор хайлчих гээд байх юм

Хамт алхаач надтай

Хамтдаа илч гэрлээ хуваалцая

Үдэш болж байна

Өнгө гэгээ солигдоод уярмаар

Гэхдээ

Ганцаараа болхоор жиндэх гээд байх юм

Хамт алхаач надтай

Хамтдаа жихүүн жаврыг үргээе

Сар гарч байна

Саруулхан туяа татаад үзэсгэлэнтэй

Гэхдээ

Ганцаараа болхоор сүүдрээсээ цочоод байх юм

Хамт алхаач надтай

Хамтдаа сарны гэрлээр наадая

Өглөө болж байна

Шувуу жиргээд инээмээр

Гэхдээ

Ганцаараа болхоор шувуудад атаархах юм

Хамт алхаач надтай

Хамтдаа маргаашийн тухай ярилцая

Би тэнгэр гэдэг амрагтай

Тэр үргэлж үүлээр

Уран зураг зурдаг

Болзооныхоо товыг тэр надад

Салхиар дамжуулж хэлдэг

Бороо гэдэг хөшиг

Бидний учирлаар нээгддэг

Намайг хайрласан хайраа

Тэр миний зүрхэнд нуудаг

Нар гэдэг гэрлээр

Үргэлж гэрэлтүүлж байдаг

     Хардхаараа тэр хатуу

     Хар биш гал шиг өнгөтэй

     Аянга цахилуулж

     Намайг хармалдаг

Би тэнгэр гэдэг амрагтай

Тэр удахгүй надад

Бороо гэдэг бэлэг өгнө