Тодорхой зүйлийг хүлээнэ гэдэг

Хамгийн сайхан мэдрэмж

Тодорхойгүй зүйлийг хүлээнэ гэдэг

Хамгийн гунигтай мэдрэмж

Үгээ хэлчихээд хүлээнэ гэдэг

Хамгийн тайван мэдрэмж

Үгээ хэлэх гэж хүлээнэ гэдэг

Хамгийн хэцүү мэдрэмж

Яасан ч хол юм бэ дээ аав ээж бид гурвын нутаг

Яваад л очъё гэхээр хөл минь богинодоод байх юм

Амьгүй уул ус, бяцхан сууриныг санаж зүүдлээд яахав

Мартаад л орхиё гэхээр

Ямар ч урт юм бэ дээ энэ зүрх сэтгэл

Алтайн хөх уулсыг

Намхан гэж эндүүрэв

Аргаль янгир ирвэс

Оройд нь өтөлдөг болохоор

Сарьдаг гэж нэрлэсэн юм

Алтайн хөх салхийг

Хатуу гэж эндүүрэв

Аавын үгүйд ч

Хүрээд очиход

Нулимас арчин аргаддаг болохоор

Үзүүр нь зөөлөн байдаг юм

Алтайн хөх голыг

Хатсан сайр гэж басамжлав

Уулынхаа оройд мөнхөрсөн

Хурмастын ариун ус

Бэл говио ундаалах гэж

Хавартаа ширүүнээр буун

Үерлэдэг юм

Алтайн хөх чулууг

Хад гэж андуурав

Хайрлан хүндлээд гишгэвэл

Хөл дороос өнхрөөд холдох

Зөөлөн хөх чулууд

Зөнгөөрөө л тэндээ

Хайргашиж байдаг юм

Март хүмүүс минь намайг март

Ганцаардлаа ганцаараа туулаад

Ангижиртал минь битгий сана

"Хэрвээ би төрөөгүй байсан бол ганцаардахгүй"

Хэтэрхий арчаагүй энэ бодлоо гээтэл минь бүү дурс

...Өнөөдрийн төлөө

Маргаашийг мартагсад ..

Зуун жилийн дараа

Байгаа зүйлс байхгүй болоход

Зуун жилийн дараа

Байхгүй зүйлс бий болоход

Өчүүхэн энэ биенээс

Ширхэг үс ч үлдэхгүй

Өндөрт өргөн газарт унагаагүй

Нэр гавъяа л үлдэнэ...

...Маргаашийн төлөө

Өнөөдрийг золигсод

Нөгөөдөрийг магад харахгүй...